Биир сыл Үс Улуу дьону көтүппүт дьоллоох түһүлгэлээх Кытаанахтар
Дьоллоох түһүлгэлээх Кытаанахтар, биир сыл Үс Улуу дьону көтүппүт Килэҥкибит килбэйэр киинигэр, Кытаанахпыт нэһилиэгэр, бэҕэһээ, балаҕан ыйын 5 күнүгэр ,Саха сирин, Арассыыйа уонна Аан дойду успуордун устуоруйатыгар чаҕылхай кылааты киллэрбит, көҥүл тустууга ССРС, РСФСР, САССР успуордун үтүөлээх тириэньэрэ Дмитрий Петрович Коркин төрөөбүтэ 98 сылынан үөрүүлээх тэрээһин ыытылынна. Тэрээһини , нэһилиэк Иван Пономарев баһылыктаах дьаһалта кэлэктиибэ, Айталина Пономарева дириэктэрдээх «Түһүлгэ» норуот айымньытын үлэһиттэрэ олус сэргэхтик иилээн-саҕалаан ыыттылар.
Үөрүүдлэх чааска мустубут оскуола үөрэнээччилэрин, олохтоохторун, Улууспут баһылыгын социальнай боппуруостарга солбуйааччы Мария Филипповна Кронникова, улуус дьаһалататын успуорка управлениетын начаалынньыга Дьулустаан Егоров салайааччылаах дэлэгээссийэни алаадьынан, кымыһынан, саламаатынан биэнсийэлээхтэр айах туттулар (бэр. Любовь Монгуш)
Улууспут баһылыгын социальнай боппуруостарга солбуйааччы Мария Филипповна Кронникова, баһылыкпыт Иван терентьевич Пономарев өрүү да буоларын курдук өрө көтөҕүүлээх тыл этэн бар дьону эҕэрдэлээтилэр, биир сомоҕолоһон өрүү инники күөҥҥэ бииргэ буоларбытын тоһоҕолоон бэлиэтээтилэр
Улуу тириэньэрбитин долгуйан туран ахтан-санаан аастыбыт. «Дмитрий Петрович биһигини соҕотох тустууга эрэ буолбакка, киһи быһыытынан чиҥник ииппитэ. Кини эппит тыллара, эрчийбит методикалара билигин даҕаны биһиги сүрэхпитигэр бааллар. Алааһыгар балаҕан тутуллара — бу киниэхэ, кини үөрэнээччилэригэр уонна бүтүн саха норуотугар сүгүрүйүү бэлиэтэ», — диэн Дмитрий Петрович иитиллээччитэ Афанасий Захаров санаатын үллэһиннэ.
Тэрээһин биир сүрүн хамсааһынынан “Старт празднованию к 100-летию” бэлэһипиэттээх айан (велопробег) буолла. Бу дьаһал — Улуу Куоркуммут төрөөбүтэ 100 сылын туолуор диэри ыытыллыахтаах далааһыннаах хамсааһын бастакы хардыыта. «Старт празднованию к столетию Дмитрия Петрович Коркина» велопробег кыттыылаахтарыгар, РФ худуоһунньуктарын Сойууһун чилиэнэ, биир дойдулаахпыт, Артемий Лебедев студиятын сүрүн дизайнера, Саха сиригэр аан бастакынан «Аан Алахчын» муралы, арт объектары оҥорбут худуоһунньук,куораппыт таас дьиэлэригэр уруһуй хаалларан Сахабыт сирин дьонун-сэргэтин үөрдүбүт, Кыыдаана Игнатьева, бу күҥҥэ анаан оҥорбут дьаралыга футболкаҕа түһэриллиннэ.
Бу күн нэһилиэкпит киэн туттар спортсменнара, хайыһардьыт, сүүрүк, дьоһун саастаах Зинаида Андреева
Нэһилиэкпитигэр үс созывка баһылыгынан олорбут, спорду өрө туппут Иван Петрович Игнатьев уо.д.а. бааллара ыччакка өрүү холобур буолаллар.
Бэлэһипиэтинэн сүүрүүгэ кыттыбыт эдэр ыспарсымыаннар уонна тэрилтэ бэрэстэбиитэллэрэ удьуор утум салҕанарын, тириэньэр идиэйэлэрэ тыыннаахтарын туоһулаатылар.
Үөрүүлээх күҥҥэ өссө биир устуоруйа суолталаах түгэн тосхойдо. Дмитрий Коркин сырдык аатын, кини сыралаах үлэтин үйэтитэр сыаллаах-соруктаах, төрөөбүт алааһыгар балаҕан тутуутугар анал пуонда үлэтин, Кытаанах сириттэн саҕалаата. Бу бырайыак норуот сомоҕолоһуутун бэлиэтинэн буолар. Пуонда өйөөччүлэрин испииһэгин номнуо биллиилээх бөҕөс, Дмитрий Петрович иитиллээччитэ, ССРС спордун көӈүл тустууга маастара, Сойууска ыччакка 5-с миэстэлээх Афанасий Захаров бастакынан үбүнэн көмөтүн киллэрэн, аҕам саастаах спортсмеммыт Зинаида Андреева, эдэр учуутал, ыччат Саргылаана Бабиченко, тэрилтэ салайааччылара уонна да атын ьиир дойдулаахтарбыт үйэтитии үлэтигэр үтүө холобуру көрдөрдүлэр. Билигин пуонда үлэтэ күргүөмнээхтик барарыгар араас элбэх хамсааһыннар барыахтаахтарын Мария Филипповна тэрээһин кыттыылаахтарын эҕэрдэлээн туран билиһиннэрдэ. Бу эбийиэк Коркин аатын сүгэр көҥүл тустуу академиятын утумнаах үлэтин, саха успуордун духуобунай киинин быһыытынан эрэ буолбакка, туризм сайдыытын тирэҕинэн эмиэ буолуоҕа. Манна кэлбит ыалдьыттар саха култууратын, успуордун устуоруйатын кытта билсиэхтэрэ. Бу бырайыагы өйөөһүн — инники көлүөнэни патриотизм тыыныгар иитиигэ улахан төһүү күүс буолуоҕа.
Бу курдук, Дмитрий Коркин төрөөбүтэ 98 сылыгар анаммыт күн кини аата умнуллубатын, оттон кини үөрэппит-такайбыт олимпиецтара, чөмпүйүөннэрэ — саха норуотун киэн туттуута буолалларын итэҕэтиилээхтик көрдөрдө. Итинник далааһыннаах бэлэһипиэтинэн сүүрүүлэр уонна мемориальнай эбийиэктэр тутуулара 2026–2028 сылларга тириэньэр 100 сылын бэлиэтиир үбүлүөйдээх дьаһаллар тумус тутуллар хайысхалара буолуохтара.Дмитрий Коркин бүүһүгэр сибэкки дьөрбөтүн кини иитиллээччитэ Афанасий Васильевич Захаров, баһылыкпыт Иван Терентьевич Пономарев, улуус баһылыгын социальнай боппуруостарга солбуйааччы Мария Филипповна Кронникова, улуус дьаһалататын успуорка управлениетын начаалынньыга Дьулустаан Егоров уонна убаастабыллаах ыалдьыттарбыт, ону тэӈэ, кинилэри кытары биир кэккэҕэ туран оскуолабыт бэрэсидьиэнэ Арылхан Пономарев уурсубута эмиэ сонун көстүү буолла. Бу буоллаҕа үүнэр көлүөнэҕэ дьоммут үтүө ааттарын өрө тутан инники күөӈӈэ тутан үйэтитэрбит.
