Муҥха 2025
Алтынньы 26 күнүгэр, Кытаанахха нэһилиэк уопсай муҥхата Мааллаҕа буолла. Муҥхалаахтар Петр Дмитриевич Барашков, Василий Аверкьевич Потапов муҥхаларынан эбиэккэ дылы уонна эбиэттээн баран биирдиитэ түһүү буолла. Эбэбит көмүс хатырыктааҕыттан 3-түү күрдьэҕи кэлбит дьоҥҥо бэристэ ону таһынан, дьиэҕэ олорор аҕам саастаахтарбытыгар, куруук ханнык баҕар тэрээһиҥҥэ куруутун спонсордыыр киһибитигэр Мотрена Ильиничнаҕа сибиэһэй балыктан амсайыыга кэһии гынан «»Кытаанах нэһилиэгэ» тыа сирин түөлбэтин баһылыга Иван Терентьевич Пономарев спортинструкторынаан Петр Бабиченколыын түҥэттилэр. Муҥхаҕа эһээлэр чиэннэрин илдьэ сылдьан муҥха үөрүйэхтэригэр, сиргэ -уокка тутта-хапта сылдьыы, сиэр -туом курдук эһээ оскуолатын ыыталлара уонна муҥхаҕа кэлбит биир дойдулаахтарбыт балык таһааран сүөкүүргэ хаары хайдах күрдьүллүөхтээҕин көрдөрөллөрө кэрэхсэбиллээх.
Петр Дмитриевич Барашков сиэнинээн Айхаллыын
Алексей Николаевич Пономарев сиэнин Мичили ону таһынан аймах, табаарыс оҕолору илдьэн кэлиитэ оҕолорго эмиэ туспа сылаас өйдөбүл буолуоҕа. Күөлгэ киирэн иһэн хайаатар да уот тула ыраастанан киирии сиэриттэн-туомуттан саҕалаан эһээ барытын көрдөрөр, кэпсиир.
Ыал улахан оҕото, Чурапчытааҕы спортивнай оскуола иитиллээччитэ Гоша Афанасьев эмиэ балыктааһыны, кыра эрдэҕиттэн, хос эһээтинээн Петр Даниловичтыын көрө — билэ улааттар да, сырыы ахсын туох эмэ саҥаны билэбин диэн санаатын үллэстэр. Баһылыкпыт Иван Терентьевич олус сыыдамнык, сып-сап үллэһиги ыытан, муҥха күнүн олус туһалаахтык, чуумпутук, ону таһынан Николай Федорович баар буолан элбэх саҥа иһиттибит, биллибит.
мантан салҕыы муҥха түгэннэриттэн хаартыскалары көрүҥ
