Кытаанахха баһылык СОЛОТУГАР киирдэ
Кытаанах нэһилиэгэр талыллыбыт «Кытаанах нэһилиэгэ» тыа сирин түөлбэтин баһылыга Иван Терентьевич Пономарев солотугар киирэр үөрүүлээх тэрээһинигэр Чурапчы улууһун аҕа баһылыга Степан Анатольевич Саргыдаев, Чурапчы улууһун дьокутааттарын сэбиэтин бэрэссэдээтэлэ Яков Павлович Оконешников, Чурапчы улууһун нэһилиэктэрин баһылыктара уонна улуус, нэһилиэк тэрилтэлэрин, түмсүүлэрин салайааччылара кыттыыны ыллылар. Тэрээһин бастакы түһүмэҕэр Кытаанах нэһилиэгин 663 нүөмэрдээх быыбардыыр хамыыһыйатын бэрэссэдээтэлэ Анастасия Дмитриевна Винокурова быыбар түмүгүн иһитиннэрдэ ону кытта быыбардыыр хамыыһыйа бэрэссэдээтэлин солбуйааччы Елена Алексеевна Пономарева, Иван Терентьевичка баһылыгынан уонна олохтоох нэһилиэк дьокутааттарыгар талыллыбыттарын туһунан дастабырыанньалары туттарда. Бу дьыл балаҕан ыйын 14 күнүгэр ыытыллыбыт быыбарга норуот итэҕэлин ылан кыайбыт, Иван Терентьевич Пономарев «Кытаанах нэһилиэгэ» тыа сирин түөлбэтин баһылыгын үрдүк солотугар киирбитин иһитиннэрдилэр.
Үс Гимн тыаһынан доҕуһуолланан, Арассыыйа, Саха Өрөспүүбүлүкэтин, Чурапчы, Кытаанах нэһилиэгин былаахтарын анныгар Кытаанахха икки төгүл талыллан үлэлээбит баһылык Егор Николаевич Потапов эдэр баһылык Иван Терентьевич Пономаревка, Өксөкүлээх Өлөксөй Ортоку олугуттан «Алгыһы» үөрүүлээх быһыыга- майгыга туттарыыта дохсун ытыс тыаһынан доҕуһуоланна. Бу үөрүүлээх түгэҥҥэ улууспут баһылыга Степан Анатольевич Саргыдаев улуус салалтатын аатыттан эҕэрдэлээтэ, эдэр, эрчимнээх саҥа баһылыкка туруоруммут сыалын ситиһэригэр, нэһилиэгин сайдыытын туһугар бары кыаҕын туһанан таһаарыылаахтык үлэлииригэр баҕа санаатын эттэ. Нэһилиэкпит Ытык кырдьаҕаһа, ааспыт үйэ кэрэһитэ, («сэрии буолла»диэн суостаах иһитиннэриини эт кулгааҕынан истибит соҕотох кырдьаҕаспыт буолар)Матрена Семеновна Леонтьева эдэр баһылыкка кэс тылын эттэ, алгыһын анаата. Сайдыы суолун тутуһа, сарсыҥҥы күнүн түстэһэ , олохпут оҥкулун оҥорсо, сүбэни –соргуну түмэ бүгүҥҥү үөрүүлээх күҥҥэ элбэх алгыс тыл этилиннилэр. Бүгүҥҥү сүдү суолталаах күн, нэһилиэкпитигэр 50 сыл олох устун бииргэ хаампыт ытык ыал Анисия Филипповна, Петр Дмитриевич Барашковтары көмүс сыбаайбаларынан — 50 сылларынан, улуустааҕы Ытык олох «Бочуот кинигэтигэр» киллэрии сиэрэ — туома ыытылынна. СӨ гражданскай туруктары акталыыр управление Чурапчытааҕы салаатын салайааччыта, СӨ ыччатын политикатын туйгуна Анастасия Ивановна Афанасьева үөрүүлээх-быһыыга майгыга илии баттатта. Степан Анатольевич, Яков Павлович дьоһун саастаах дьоһун ыалы дьоһун сылларынан эҕэрдэлээн 50 тыһ.сэртипикээти туттардылар. Улууспут баһылыга Степан Анатольевич нэһиэлиэкпит хас биирдии олохтооҕор кэмигэр болҕомто уурарбытын үрдүктүк сыаналаан махтанна, Барашковтар дьиэ-кэргэни эдэр ыччакка уһуннук бииргэ олорбут олоххутунан, үлэҕитинэн-хамнаскытынан холобур буолаҕыт диэн бэлиэтээтэ, Үйэтитиигэ СӨ муниципальнай сулууспатын туйгунун Екатерина Прокопьевна дьиэ-кэргэнэ күүскэ үлэлиирин махтана аҕынна, таарыйа нэһилиэкпит 100 сыллаахтарыгар аналлаах ыһыахпытын эмиэ хайҕабылынан аҕынна. Онон, Кытаанахтар түмсүүлээххит, саҥа баһылыккыт тула эмиэ түмсүҥ, үүнүҥ-сайдыҥ диэн кэс тылын анаата. Бүгүҥҥү тэрээһиммит түмүктүүр чааһа, Кытаанах нэһилиэгин баһылыгар 2 төгүл нэһилиэгин эрэлин, куолаһын ылан, 10 сыл устата Кытаанах сайдыытыгар сыратын ууран үлэлээбит, Кытаанах нэһилиэгин Бочуоттаах олохтооҕун, СӨ ыччатын политикатын туйгунун, «Оройуон сайдыытыгар кылаатын иһин» 3-с (бу киэһэттэн) 2-с истиэпэннээх, Федор Попов «Патриот сүрэҕэ», «Үтүө дьыалалар» хамсааһын, «Саха сирин Өйдөбүнньүктэрин» харыстааһын бэлиэлэр хаһаайыннарын Егор Николаевич Потаповы солотуттан атаарыы сиэрэ-туома ыытылынна. Егор Николаевич ыыппыт үлэлэрин бу сигэнэн киирэн ааҕаарыҥ.
https://санаолох.рф/kytaanahha-ivan-ponomarev-%D2%AFrd%D2%AFk-solotugar-kiirde-fotoreportazh/
Бүгүн Егор Николаевичка нэһилиэк түмсүүлэрин, тэрилтэлэрин, улуус салалтатын уонна тэрилтэлэрин, баһылыкктарын, дьокутааттарын ааттарыттан элбэх махтал, эҕэрдэ тыллар этилиннилэр. Чахчы да Егор Николаевич сатабыллаах салайааччы буолан иккис созывыгар талыллан нэһилиэккэ элбэх өрүттээх үлэни ыытта.
Кытаанахха баһылык солоҕо киирэр үөрүүлээх чааһа, сүр көтөҕөр Оһуохайынан түмүктэннэ.
