Собо миинэ
Ыаллыы сытар, профессор Г.П.Башарин аатынан Сылаҥ агрохайысхалаах орто оскуолатыгар финансовай грамотноска үөрэтэр сыаллаах агробырайыактара быйыл агробизнес буолан, оҕолор харчыны сөпкө туттарга, хайдах оҥорорго үөрэнэллэр, олоххо туһалаах элбэх сатабыллары иҥэринэллэр. Оҕолор олус сөбүлээн дьарыктаналлар. Агрохайысха5а дириэктэри солбуйааччы Лидия Степановна Сивцева сүрүннээн, бары кылаас салайааччылара финансовай грамотноска оҕолору кытта үлэлэспиттэрэ хаһыс да сыла. Оҕолор онон харчы диэн тугун, хантан кэлэрин, хайдах сөпкө туттуохха сөбүн номнуо билэллэр. Оҕолору эрэ кытта буолбакка, кинилэр төрөппүттэрин кытта эмиэ ыкса сибээстээхтик үлэлэһэллэр. Бэҕэһээ, олунньу 14 күнүгэр 5 кылааһын үөрэнээччилэрэ уонна кинилэр төрөппүттэрэ суһал байыаннай дьайыыга сылдьар саха уолаттарыгар, тута сииргэ бэлэм 102 устуука хатарыллыбыт «Собо миинэ» оҥорон бэлэмнээтилэр. Биир дойдулаах уолаттарбытыгар сотору дойдуларын аһа, собо миинэ, тиийиэ. Иҥэмтиэлээх собо миинин, ахтыбыт төрүт астарын, астына — дуоһуйа амсайыахтара. Кылаас салайааччыта Наталья Михайловна Говорова,күн күбэй ийэлэр уонна үөрэнээччилэр собону буһаран, хатаран, чочунаахтаан саха уолаттарыгар анаан, ис сүрэхтэриттэн кыһаллан, истиҥ тапталынан оҥорон оскуола администрациятыгар туттардылар. Оҕоҕо оскуола сааһыттан духуобунай патриотизмы иҥэрэр тоҕоостооҕунан агрохайысха иитии биир сүрүн сорҕото буолар. Дьиэ кэргэн – киһи аймах култууратын бастакы күөнэ, уопсастыба тирэнэр тирэҕэ, бигэ кытыла буоллаҕа. Онон бу төрөппүттэр оҕолору кытта бииргэ буолуулара, оҕолор ис сүрэхтэриттэн суһал дьайыыга сылдьааччыларга анаан оҥоруулара Патриотизм тыыныгар уһуйуу уонна олоххо бэлэмнээх буола улаатыыларыгар тирэх буолар.
