Дьиэ кэргэнинээн ааҕыы фестивала
“Дьиэ-кэргэнинээн ааҕыы” фестивала
III төгүлүн ыытылынна.
Алтынньы 25 күнүгэр, Кытаанахтааҕы тыа сирин модельнай библиотекатыгар, “Дьиэ-кэргэнинээн ааҕыы” фестивала III –c төгүлүн ыытылынна. 1-4 кылаастан 1-дии үөрэнээччи төрөппүттэринээн кыттыыны ыллылар. 1 кылаастан Алик Афанасьев ийэтинээн Альбина Эдуардовналыын, аҕата Иван Савельевичтыын, 2-4 кылаастартан Эрхаан, Харыс ийэлэринээн Роза Андреевналыын, 3 кылаастан Сахая аҕатынаан Василий Аверкьевич Потаповтар. Бүгүҥҥү конкурска кытта кэлбиттэри, көрөөччүлэри, учууталлары “Кытаанах нэһилиэгэ” МТ дьиэ-кэргэн уонна оҕо эдэркээн исписэлииһэ Луиза Константиновна үүнэн эрэ ыччаттары элбэхтэ ааҕыҥ, ааҕыы нөҥүө оҕолоргутун кытта ыкса ситимнээх буолан, дойдуларыгар бэриниилээх, үрдүк култууралаах, дьоһун дьон буола улааталларыгар баҕа санаатын олус истиҥник тиэртэ. “Үйэн” дьахтар сүбэтин бэрэссэдээтэлэ Ксения Николаевна дьиэ-кэргэн уонна оҕо ситимэ күүһүн ордук тоһолҕолоон бэлиэтээн туран, бу ааҕыы онно олус улахан тирэх буоларын эдэр төрөппүттэргэ сүбэлээн, уонна эҕэрдэтин тиэрдэн туран хас биирдии дьиэ-кэргэҥҥэ сахабыт сирин туһунан олус туһалаах информациялардаах кинигэни бэлэхтээбитин дохсун ытыс тыаһынан доҕуһуоллаатылар. Эҕэрдэ тылы уонна элбэхтик ааҕар киһи хайдах дьоһун киһи буоларын, ааҕыы туохха туһалааҕын, аныгы үйэҕэ ханнык кинигэлэр баалларын, ханныктар ордук чугастарын олус сиһилии уонна истиҥник, өйдөнүмтүөтүк “Түһүлгэ” норуот айымньытын Дьиэтин уус-уран салайааччыта Любовь Николаевна Монгуш эттэ. Дьүүллүүр Сүбэҕэ Учууталлар учууталлара, СӨ үөрэҕириитин туйгуна, саха тылын уонна литэрэтиирэтин учуутала Ольга Романовна Аржакова, саха тылын уонна литературатын учуутала, оскуола библиотекара Лена Степановна Терютина үлэлээтилэр. Конкурсаннарбыт 5 –тии ыйытыктаах 5 түһүмэххэ ааһан иһэн эппиэттээтилэр. Онтон талан ылбыт сорудахтарынан оҕолор мультиктары таайтаран ону төрөппүттэрэ таайдылар. Маны таһынан үһүс сорудахтарынан дьиэтээҕи үлэлэрэ лэпбук оҥоруута этэ. Кыттааччыларбыт мындырдарын, сатабылларын киһи эрэ сөҕө көрөр, олус интэриэһинэй кинигэлэри оҥорбуттар. Күрэх түмүгэ тахсыар дылы “Каадырга ааҕар дьиэ-кэргэн” хаартыскаҕа түһүү буолла. Дьэ күүтүүлээх түмүк кэннэ, дьүүллүүр сүбэ маннык ааттары анаата:
“Бастыҥ лэпбук” анал ааты саамай кырачааан кыттааччыбыт, улахан түһүлгэҕэ бастакытын сүрэхтэммит Алик Афанасьев ийэтинээн Альбина Эдуардовналыын, аҕатынаан Иван Савельевичтыын ыланнар “Кытаанах нэһилиэгэ” МТ (баһылык Потапов Е.Н) туруорбут сүрүн бирииһин ыллылар, маны таһынан бастакы кырачаан кыттааччы буолан библиотека сакалаатын тутан үөрүүтэ үксээтэ.
“Тииҥ мэйии” анал ааты Сахая аҕатынаан Василий Аверкьевичтыын ыллылар уонна кинигэ бирииһи туттулар.
“Бастыҥ артыыс” анал ааты Эрхаан,Харыс, Роза Андреевна Пономаревтар тутан үөрдүлэр уонна бэртээхэй энциклопедиянан наҕараадаланнылар. Бары кыттыбыт дьоммутугар, учууталларбытыгар, төрөппүттэрбитигэр, “Кытаанах нэһилиэгэ” МТ баһылыгын солбуйааччы Екатерина Иннокентьевна Скрябинаҕа, дьиэ-кэргэн исписэлииһэ Луиза Константиновна Барашковаҕа, “Түһүлгэ” норуот айымньытын Дьиэтин уус-уран салайааччыта Любовь Николаевна Монгушка, Кытаанахтааҕы “Үйэн” дьахтар Сүбэтин бэрэссэдээтэлигэр Ксения Николаевна Гоголеваҕа махталбын тиэрдэбин. Тэрээһин үлэтигэр күүс-көмө буолбут “Түһүлгэ” норуот айымньытын Дьиэтин методиһыгар Николай Иванович Суздаловка, хаартыскаҕа түһэрбит учууталларбытыгар Наталья Николаевна Игнатьеваҕа, Анисия Николаевна Дьяконоваҕа махтал тылларын аныыбыт.
