Кытаанахха икки күн устата көхтөөх субуотунньук ньиргийдэ
Нэһилиэкпитигэр тустуу ссалата тутуллар сураҕа иһиллиэҕиттэн, дьон – сэргэ хайдах эрэ настарыанньаланан, ис-истэриттэн сүргэлэрэ көтөҕүллэн субуотунньуктарга сырыттылар. Онтон иллэрээ күн уонна бүгүн, тыраахтар тохтообокко бирилиир, “Дружба” эрбии, сүгэ тыаһа тохтоло суох охсон тиҥийэр тыаһа урукку кэмнэри санатан куула тыа саҕатыгар тиийэ иһиллэн күргүөмнээх үлэ икки күн күөстүү оргуйда.
Бу субуотунньуктары иилээн –саҕалаан, көҕүлээн нэһилиэкпит аҕа баһылыга бэйэтинэн сылдьыыта, дьон көҕүн уһугуннарар, биир тыынныыр. Чахчы да Улуу Куоркун киинэ түспүт сиригэр тустуу саалата тутуллара дьон санаатын көнньүөрдэр. Егор Николаевичка бу санаа киириэҕиттэн кэлэн-баран, матырыйаалларын булан-талан номнуо күн бүгүн акылаата түстэ. Субуотунньукка — көҥүл тустууга ССРС спордун маастара, ССРС-ка улахан дьонно 5 миэстэлээх, дуобакка спорт маастарыгар кандидат Захаров Афанасий Васильевич , көҥүл тустууга норуоттар икки ардыларынааҕы кылаастаах спорт маастара, Россия чемпиона Егор Пономарев аҕата Терентий Иванович Пономарев, куруутун нэһилиэк тэрээһиннэригэр көхтөөх кыттыыны ылар Николай Давыдович Андреев, Иван Собакин уонна да атыттар бу үтүө дьыаланы биһирээн, хара саҕаланыаҕыттан субуотунньуктарга сырыттылар.
