Кытанахская модельная библиотека

Балаҕан ыйын 5 күнүгэр, Саха биллиилээх тренерэ, педагога, Саха АССР оскуолаларын үтүөлээх учуутала, Саха АССР, РСФСР уонна ССРС үтүөлээх тренерэ, Бочуот Знага итиэннэ Октябрьскай революция орденнар кавалердара, биир дойдулаахпыт Дмитрий Петрович Коркин төрөөбүтэ 95 сыла.

     Дмитрий Петрович 1928с. балаҕан ыйын 5 күнүгэр Чурапчы оройуонун Кытаанах нэһилиэгэр төрөөбүтэ.
   Аҕата Коркин Пётр Кириллович уонна ийэтэ Мария Андреевна эрдэ өлөннөр, үс оҕо тулаайах хаалаллар.
Алта саастаах Диманы Лазаревтар дьиэ кэргэн иитэ ылаллар.
    Ииппит дьоно Пелагея, Михаил  Лазаревтары кытары хоту күүс өттүнэн көһөрүллүүгэ Булуҥҥа бараллар.

Дмитрий Булуҥ оройуонун Бороҕон нэһилиэгин сэттэ кылаастаах оскуолатын ситиһиилээхтик үөрэнэн бүтэрэр, оскуолаҕа үөрэнэр кэмигэр гимнастиканан утумнаахтык дьарыктанар.
Салгыы Дьокуускай куорат 2 №-дээх оскуолатыгар спортивнай секцияларга дьарыктанар, ГТО-ҕа куорат үс төгүллээх кыайыылааҕа буолар.

1952-1956cc. Ленинградтааҕы Герцен аатынан педагогическай институкка үөрэнэр.
Биир сыл көҥүл тустуунан уонна самбонан дьарыктанан, бастакы разряд нуормаларын толорор, кэлин Ленинград чемпиона, “Буревестник” ДСО күрэхтэһиитин иккис призёра буолар.

Дойдутугар эргиллэн кэлэн, Одьулуун сэттэ кылаастаах оскуолатыгар завуһунан, нуучча тылын уонна литературатын учууталынан үлэлиир.
Оройуон киинигэр Чурапчыга тустуу секциятын тэрийэр, 12 биэрэстэлээх сиргэ нэдиэлэҕэ үстэ сатыы кырынан – оҕолору эрчийэр.
Түөрт сыл буолан баран тустууга таптала букатыннаахтык баһыйан, Чурапчыга көһөн киирэр уонна олоҕун сүрүн сыалын – оҕо спортивнай оскуолатын тэрийиигэ утумнаах, өр сыллаах үлэтин саҕалыыр.

Кураанах миэстэҕэ эрчийэр оҕолору кытта үс саалалаах спорт корпуһун тутан таһаарар, тустууга сөп түбэһэр спортивнай тренажердары оҥотторор.
Эрчийии бастыҥ методтарыгар олоҕурбут спортивнай уһаарыллыыны барбыт Коркин үөрэнээччилэрэ сотору кэминэн үрдүк чыпчааллары дабайан бараллар.
Ол курдук, 1965с. Вячеслав Карпов саха спортсменнарыттан бастакынан ССРС оҕолорго чемпиона буолар, 1969с. оҕолорго Аан дойду чемпионатыгар Илларион Федосеев бастакы, Семён Макаров үһүс буолаллар, 1967c. Николай Захаров Польшаҕа буолбут Олимпийскай эрэллэр күрэхтэһиилэригэр кыайыылааҕынан тахсар.
1969c. ССРС чемпионатыгар Роман Дмитриев чемпионнуур, Гавриил Дмитриев уонна Николай Захаров иккис миэстэлэнэллэр.
1972с. Мюнхеҥҥа буолбут Олимпиадаҕа Роман Дмитриев чемпион үрдүк аатын ылан, тренерин үөрдэр-көтүтэр.

Чурапчы оскуолатыттан 175 – ССРС спордун маастара, 12 – норуоттар икки ардыларынааҕы кылаастаах спорт маастара, 4 – ССРС спордун үтүөлээх маастара иитиллэн тахсыбыта.

     Дмитрий Петрович тренер быһыытынан улахан билиниитэ 1976с. буолбута.
Кини үөрэнээччилэрэ — Роман Дмитриев, Павел Пинигин уонна Александр Иванов Монреальга буолбут Олимпиадаҕа ситиһиилээхтик кыттаннар, спорт эйгэтигэр дьоһун кылааты киллэрэллэр.

1977с. Д.П.Коркин Дьокуускайга көһөн кэлэн Үрдүкү спортивнай маастарыстыба оскуолатын уонна Саха сирин хамаандатын сүрүн тренердэринэн ананар.

Дмитрий Петрович Коркин 1984c. олунньу 22 күнүгэр Дьокуускайга өлбүтэ. Кини аатын Чурапчытааҕы спортивнай интернат-оскуола чиэстээхтик сүгэр. Дмитрий Петрович ыра санаатын толорон, 1999с. Чурапчыга – физическэй культура уонна спорт института аһыллыбыта.
Улуу тренер, педагог Дмитрий Петрович Коркин аатынан СР физическэй культураҕа уонна спорка эйгэтигэр государственнай бириэмийэ олохтоммута.       

    Улуу тренер Д.П. Коркин үтүө, сырдык аата чиэстээхтик үйэтитиллэр.
      Онтон бу бэлиэ күҥҥэ,улуу Куоркун төрөөбүт Кытаанаҕар, В.С.Яковлев-Далан аатынан   орто оскуолатын үөрэнээччилэригэр кылаас чааһа уонна уолаттарыгар, Дмитрий Петрович ииппит-такайбыт, үөрэппит ньымаларыгар олоҕуран, үөрэнээччилэр эт-хаан өттүнэн сайдыылаах, өй-санаа өттүнэн билиилээх, сиэр-майгы өттүнэй үрдүк култууралаах буолууларыгар тирэх буолар уонна биллэн турар Дмитрий Петровиһы биллэрэр сыаллаах, “Куоркун Дабаана”  спартианскай күрэх ыытылынна.

    Оҕолорго аналлаах күрэххэ учууталлар, оскуола администрацията кэлэн кыттыыны ылбыттара олус кэрэхсэбиллээх, тэрээһин таһымын сытыырхатар. Күрэххэ Куоркун “истиэнэтэ” илэ турбута (бу истиэнэ, Намнааҕаы педколледж устудьуона Айтал Монастырев уһуйааҥҥа сылдьан дакылаатыгар анаан оҥоһуллубут) улахан кэрэхсибили ылла, оҕолор интэриэстэрин тарта. Бу истиэнэни көрдөрөөрү анаан-минээн кыһаллан аҕалбыт Людмила Ивановнаҕа туспа махтал. Ол курдук, Куоркун истиэнэтэ, “буордаах” үрүсээк, хамсыыр “бэрэбинэ”, аһарыгаска үөрэтэр “таас чохтор”, нуустуур ньымаларынан күөрчэх эргитии курдук тыҥааһыннаах күрэххэ 3 миэстэҕэ Айсен Терютин капитаннаах “Чемпионнар” хамаанда, 2 миэстэҕэ Эрхан Барашков капитаннаах “Боотурдар” хамаанда уонна 1 миэстэҕэ Тимур Пономарев капитаннаах “Obama” хамаанда 1 миэстэҕэ таҕыстылар. Бу курдук, куруук инники күөҥҥэ сылдьан, кыра бырааттаргытыгар күүс-көмө, сүбэ-ама буола сылдьыҥ. Күрэх кылаабынай судьуйата Ньургун Собакин.