Кытаанахха сонун ис хоһоонноох көрсүһүү тэрилиннэ
Өрүү да буоларыныы, Кытаанах нэһилиэгин эдэр кэскиллээх салайааччылара: “Кытаанах нэһилиэгэ” тыа сирин түөлбэтин баһылыга Иван Пономарев, баһылык солбуйааччыта Екатерина Скрябина, Василий Яковлев-Далан аатынан Кытаанах орто оскуолатын дириэктэрэ Иван Коркин, оскуола дириэктэрин үөрэх чааһыгар солбуйааччы Мария Федорова уонна Чурапчы нэһилиэгэр олорор биир дойдулаахпыт Прокопий Захаров кэскиллээх анаарыыларынан, Билим күнүгэр аналлаах дэкээдэ иитинэн Кытаанахтар доҕордуу көрсүһүүлэрин олус тэрээһиннээхтик, сонуннук, туһалаахтык толкуйдаан ыыттылар.
Ол курдук, бүгүн, олунньу 14 күнүгэр, Кытаанах нэһилиэгэр, В.С.Яковлев-Далан аатынан оскуола баазатыгар, Чурапчыга олорор биир дойдулаахтарбыт түмсүүлэрин салайааччыта Прокопий Прокопьевич, Чурапчы Кытаанахтара Билим нэдиэлэтин чэрчитинэн десант оҥордулар.
Кытаанахтан төрүттээх педагогическай билим хандьыдааттара Чурапчытааҕы Судаарыстыбаннай физическэй култуура уонна успуорт үнүстүүтүн ректорын солбуйааччы Евгений Коркин уонна декан Эдуард Федоров педагогическай кэлэктииби кытары төгүрүк остуол тэрилиннэ.
Степан Макаров аатынан Чурапчытааҕы гимназия информатика предметигэр учуутала Прокопий Захаров ОГЭ-ҕа, ЕГЭ-ҕэ 9 уонна 11 кылаас үөрэнээччилэригэр, Вячеслав Карпов аатынан Чурапчытааҕы оҕону уонна ыччатыр успуорка уһуйар оскуола дириэктэрин солбуйааччы Светлана Захарова 11 кылаастарга математикаҕа, Чурапчытааҕы успуорт оскуола физика предметигэр учуутала Лена Терютина 11 кылаас үөрэнээччилэригэр консультациялары биэрдилэр.
“Чурапчы улууһа” МО дьаһалтатын үп-ас управлениетын отделын салайааччыта Мария Корякина уонна Чурапчытааҕы “Россельхозбаан” салаатын салайааччыта Парасковья Захарова 8-с уонна 9-с кылаастарга үп-ас чааһыгар кырааматынай буолуу уруогун ыыттылар.
Чурапчытааҕы быыһыыр сулууспа салайааччыта Николай Терютин оҕолорго суһал көмөнү оҥорууга уруок ыытта, Чурапчытааҕы аграрнай-техническэй кэллиэс исписэлииһэ, дарст успуордун маастара Илгын Мэхээлэ Уйбаан уола успуорт бу көрүҥэр маастар-кылаас тэрийдэ.
Күн иккис аҥарыгар көлүөнэлэр көрсүһүүлэрэ, волейболга күрэх буолла
манна 1 миэстэни оскуола оҕолоро ыллылар, 2 миэстэҕэ Чурапчы Кытаанахтара, 3 миэстэҕэ эдэр ыччаттар уонна 4 миэстэҕэ ытыктабыллаах бэтэрээннэр тигистилэр.
Түмүккэ санаа үллэстэн, Чурапчы Кытаанахтара көрсүһүүнү тэрийбит Килэҥки бөһүөлэгин дьаһалтатыгар уонна оскуола кэлэктиибигэр дириҥ махталларын билэрдилэр. Бу курдук, биир өрөбүл күммүтүгэр олохтоох уонна Чурапчыга олохсуйбут Кытаанахтар доҕордуу көрсүһүүлэрэ олус үчүгэйдик ааста.
