Саҥа Дьыллааҕы сүпсүлгэни сэргээҥ
Видеокомикс күрэҕин көрүҥ диэтэххэ, элбэх киһи соһуйар, ол аата тугуй диэн ыйытааччы элбиир. Бу, В.С.Яковлев-Далан аатынан Кытаанах орто оскуолатыгар библиотекарынан 9 сыл устата үлэлээбит коллегам, Ирина Николаевна Гаврильева толкуйунан алын кылаас оҕолоругар уонна кинилэр учууталларыгар анаан «Саҥа дьыллааҕы сүпсүлгэннэр» диэн, бэйэтин уонна ийэтин оскуолаҕа өр сылларга библиотекарынан үлэлээбит Матрена Павловна Местникова бириистэригэр видеокомикс күрэҕин биллэрбитэ. Дьэ, саас-сааһынан түгэхтэн саҕалыаҕыҥ. 20 сыл устата «Түһүлгэбит» тула көрдөөх-нардаах, көр-күлүү аргыстаах бырааһынньыктарбыт,библиотечнай тэрээһиннэрбит элбэхтик Матрена Павловна кыттыылаах ааһаллара. Хомолтолоох да буоллар, ааһаллара диирбитигэр тиийэбит, наһаа ис -иһиттэн кругозордаах, юмордаах, көхтөөх этэ. Матрена Павловна уонна онтон олохтоохтор бэйэҕит да билэргит быһыытынан олус бэһиэлэй, чахчы сырдык киһи этэ. Ардыгар таҥас уларыттыылаах ахсаана суох үбүлүөйдэргэ, эгэлгэ маасканы оҥостуулаах Саҥа дьыллааҕы баалларга, үтүмэн бырааһынньыктарга кини хайаан даҕаны инники күөҥҥэ, бастакы кирбиигэ сылдьарыттан бэйэбит тэттэрбит.
Биһиги Кини эдэрдии эрчимин өссө да ыһыкта илигиттэн үөрэрбит, балайда сэниэлээҕин сөҕөрбүт-махтайарбыт. Ол эрээри дьылҕа хаан ыйааҕынан биһиги кэккэбитигэр билигин суох, Ийэ оҥостон кэбиспит Мотрена Павловнабытын олуһун да суохтуубут, ахтабыт.. Павловна олох араас боппуруостарыгар киһи эрэ истэ олоруох курдук,наһаа ылыннарыылаахтык кэпсиирэ,быһаарара. Дьэ чахчы атас киэнэ ааттааҕа, артыыс бастыҥа,ийэ,эбэ улахан далбара, уйан,аһыныгас дууһалааҕа. Араас уруоктары,тэрээһиннэри ыытаары бэлэмнэнэн суруйа олорон кытта тэҥҥэ кэпсэтэ олорор буолааччы. Дьээбэлэнэрин олус таптыыра,онон киниэхэ туох эмэ дьээбэлээҕи кэпсииргэ эрдэттэн бэлэмнэнэн тиийэбин. Онно дьэ ”үөһэ тэстэр”. Биһиги курдук уһуннук ыгылла-ыгылла күлбэт идэлээх, эмискэ тэһэ баран күлэ түһэн баран киһим тохтоон хаалар. Онтон салгыы кэпсээммин бэйэтэ байытан, сиэллээн-кутуруктаан, аны бэйэҥ иэрийэ-иэрийэ күлэ олорор буолаҕын. Онтукатыттан наһаа астынар, дуоһуйар буолара.Үлэтиттэн уонна бу сирдээҕи олоҕуттан наһаа дуоһуйууну ылар этэ.Сүрэххэ баар сырдык өйдөбүл хаһан да сүппэт, өрүү тыыннаах буолар…
Сүрэхпитигэр хаалар үтүө майгылаах, сырдык истиҥ мичээрдээх Мотрена Павловнабыт оһоҕос түгэҕинээҕи оҕото, кырата Ирина Николаевна Гаврильева ийэтин туйаҕын хатаран библиотечнайы бүтэрэн оскуолаҕа эмиэ олус таһаарыылаахтык үлэлээбитэ. Тэрээһиннэрбитин бииргэ ыытарбыт. уруок буоллун, биэчэр буоллун, иһитиннэрии, кылаас чаастара буоллуннар, өй күрэхтэрэ, ааҕыылар, библиотечнай фестиваль… барытыгар бииргэ сылдьарбт. Ирина Николаевна техническэй өттүгэр олус күүстээҕэ, эдэр киһи ити өттүгэр үөрэппитэ да үгүс. Ирина Николаевна, ийэтин сырдык кэриэһин өрө тутан ийэлээх кыыс бириистэригэр диэн бэртээхэй конкурсу толкуйдаабыта. Бу эмиэ Ийэҕэ махтал, таптал, ытыктабыл бэлиэтэ буолар. Бу холобур эдэр ыччакка үтүө холобур буолар. Клонкурс үлэлэрин сигэнэн киирэн Кытаанахтааҕы тыа сирин модельнай библиотекатын рутуб ханаалыгар көрөөрүҥ. Түгэнинэн туһанан, өрүү да көхтөөх алын кылаас салайааччыларыгар махталбытын тиэрдэбит, бу курдук хомуллуулаах, бу курдук көрдөөх,көхтөөх тэтимҥит үөрэнээччилэргитигэр, кинилэр төрөппүттэригэр холобур, үчүгэйи, кэрэни кэрэхсииргэ тирэх, олук буолар.