Үбүлүөйдээх муҥха
«……Дьэээ, бүгүн астык да астык, хаһан Да буолбатах муҥха , ытыктыыр -убаастыыр биир дойдулаахпыт Прокопий Прокопьевич Захаров төрөөбүтэ 75 сааһынан оҕолоро үбүлүөйдээх муҥханы тэрийэн, сылдьыбыт эрэ бары махтанан, эбиитин эбэбит көмүс хатырыктааҕынан добуоччу күндүлээн, 128 кууүлу ылан, астынан ,үөрэн-көтөн тарҕастыбыт, бүтэһигэр администрация үлэһиттэрэ Сергей Пономарев, Петр Бабиченко балыктарбытын олох тэлгэһэбит иһигэр киллэрэн биэрэн уолаттарга туспа махтал. …. Онтон саас сааһынан бардахха: бүгүн анаабыт курдук күн туран биэрэн, сарсыардаттан дьон мустуута, Прокопий Прокопьевич уолаттара, аймахтара кэлэн уот оттон кэлбит дьону үөрэ-көтө көрүстүлэр . Үбүлүөйдээх тэрээһин үөрүүлээх чааһа эдьиийэ Евдокия Прокопьевна алгыһынан , «Кытаанах нэһилиэгэ» тыа сирин түөлбэтин баһылыга Пономарев Иван Терентьевич бар дьонун эҕэрдэтинэн, «Түһүлгэ» норуот айымньытын Дьиэтин уус-уран салайааччыта Василий Копырин ырыатынан аһылынна.
Бүгүҥҥү муҥхаҕа Прокопий Прокопьевич ньолобуой кылаастан бииргэ үөрэммит кыыһа Ирина Иннокентьевна Захарова-Попова анаан кэлбитэ эмиэ туспа сонун,олус интэриэһинэй. Ыраахтан -чугастан аймахтар-доҕоттор тыл этэн ахтан -санаан аастылар. Прокопий Прокопьевич орто уола эмиэ Прокопий Прокопьевич аҕатын туһунан сырдатан бүгүҥҥү бырагыраамманы билиһиннэрдэ, үөлээннээх табаарыһа Петр Дмитриевич Барашков, эдэр табаарыһа, салайааччыта, эмии биир ытыктыыр-убаастыыр, өр кэмнэргэ нэһилиэги салайан толорбут Иван Петрович Игнатьев уонна аймахтара ахтыыларын, эҕэрдэлэрин анаатылар.
Онтон дьэ доҕоор, сыалаах эт бидиличчи буһар, оһохтоох балаакка тардылынна, сандалы бэлэмнэннэ, чэй оргуйар оонньуу, көр-нар оройуттан тутулунна. Хайдах эрэ бу түгэҥҥэ, сэбиэскэй диэбиккэ дылы, оччотооҕу көрдөөх-нардаах, элбэх киһилээх субуотунньуктары санатта. Тото -хана аһаан баран аны тоҥ этинэн мах бэрдэрии буолла, үөрүү көтүү өссө оройо аһылынна.Хамаандаҕа арахсан эстафеталаан «победила дружба» буолан хамаандалар согунан, пиццанан(дьэ дэлэйэ сөхтөрөр) наҕараадаланан астыныы да астыныы. эр дьоҥҥо, биирдиилээн да бастыыр иһин сонун күрэх бөҕө ыытылынна. Миин буһан, Чэй оргуйан, сып-сылаас балааккаҕа(өссө оһохтоох) тобус-толору астаах сандалы тула аһаан үөрүү-көтүү бөҕө . Барыта 83 киһи сылдьан күрэх бөҕө күрэхтэһэн үөрүү-көтүү, оҕолоро, аймахтара баһаам элбэх бирииһи туруоран дьон-сэргэ астынан, үөрэн-көтөн тарҕастыбыт….» Муҥха кэннэ тута суруйууга эргилиннэххэ, субан сүөһүнү төлөһүтүүгэ САССР чемпиона, Саха Өрөспүүбүлүкэтин тыатын хаһаайыстыбатын туйгуна Прокопий Прокопьевич Захаров
куруутун өттүк харалаах балыксыт аҕа, эһээ ытыктыыр-убаастыыр киһим, урут баарыгар муҥха кэнниттэн кырдьаҕастарга, аҥардас дьахталларга куруук (арыт аҕыйах да кэлбит буоллаҕына) устууканан да өлүүлүүр куолу диэн хайаатар да түҥэтэрэ, уонна саҥа кэлбит кийиит, күтүөт, бу нэһилиэкпит эбиллиитэ, биһигини салҕааччылар диэн таас соботунан күндүлүүр идэлээҕэ.Дьэ, онон хайаан да аатын ааттаан оҕолоро, аймахтара улахан муҥха тэрийбиттэрэ олус хайҕаллаах, аҕаларын үтүө традицията эрэ буолбакка кини аата-суола бар дьонугар өссө дириҥ махталынан иҥэн хаалыа буоллаҕа. Аҕаларын туйаҕын хатаран үлэһит оҕолоругар Гаврил, Прокопий, Алексей, Анна Захаровтарга уонна кинилэр дьиэ-кэргэттэригэр утум удьуора ууһуу-тэнийэ, тус олохторугар дьолу-соргуну, чэгиэн буолууну, таһаарыылаах үлэни-хамнаһы баҕарабыт.
