«Кыыс оҕо — олох сибэккитэ»
Сыл аайы алтынньы 11 күнүгэр Аан дойду үрдүнэн Кыыс оҕо күнэ бэлиэтэнэр
Бу күнү, 2012 сыллаахха Холбоһуктаах Нациялар Тэрилтэлэрэ биллэриэхтэриттэн бэлиэтиир буолбуппут.
Бу күн кыргыттарбытыгар күүс-көмө, өйөбүл эҕэрдэ тылын аныыбыт. Кинилэр хорсун санаалара, өйдөрө-санаалара, үтүө майгылара аан дойдуну үчүгэй өттүгэр уларытар, тупсарар кыахтаахтар.
В.С.Яковлев-Далан аатынан орто оскуола, оскуола уонна олохтоох библиотекалар, «Түһүлгэ» норуот айымньытын Дьиэтин тэрээһиннэринэн «Түһүлгэ» норуот айымньытын дьиэтигэр «Кыыс оҕо — олох сибэккитэ» 2 блоктан турар тэрээһин ыытылынна. Бастакы блога 4 үктэллээх «Кыыс оҕо омук сирэйэ» ТОТ-шоу, о.э. толкуйдатар оонньуу тэрээһин. Бу тэрээһиҥҥэ 5 эксперт: СӨ Үөрэҕириитин туйгуна, оскуола библиотекара Галина Михайловна Аммосова бэрэссэдээтэл, СӨ үөрэҕириитин туйгуна, учууталлар учууталлара Ольга Романовна Аржакова, Кытаанахтааҕы «Үрүҥ Үйэн» дьахтары Сэбиэтин бэрэссэдээтэлэ Ольга Сергеевна Собакина, уонна Сэбиэт чилиэнэ, Луиза Константиновна Барашкова, ол иһиттэн 1-э онлайн улуустааҕы үөрэх салаатын иитии уонна эбии үөрэхтээһин отделын исписэлииһэ, СӨ , РФ үөрэҕириилэрин туйгуннара, РФ Бочуоттаах үлэһитэ Екатерина Романовна Хоютанова үлэлээтилэр. Түгэнинэн туһанан, улаханнык суолта ууран кыттыыны ылбыттарыгар, Чурапчы улууһун үөрэҕэриитин управлениетын иитии уонна эбии үөрэхтээһин салаатын салайааччытыгар Евгения Ивановна Чичигинароваҕа, иитии уонна эбии үөрэхтээһин исписэлииһигэр Екатерина Романовна Хоютановаҕа дириҥ махталбытын тиэрдэбит. ТОТ шоуну ыытарга биһиэхэ орто, улахан сүһүөххэ адаптацияны толору ааспыт, олус сэргэх, иҥнибэккэ-толлубакка эппиэттиир кыргыттар буолан 6 кылаас коллектива талыллан үлэлээтэ. Манна кыыс ийэтинээн, толору ааттара ааттанан сыанаҕа ыҥырыллыннылар, онтон салҕыы кыргыттарга эбээлэрэ кэһиилээх тиийэн кэлиилэрэ соһуччу үөрүүлээх түгэнинэн буолла. Тэрээһин сыала -соруга үс көлүөнэ холобуругар кыыс оҕо иитиитин тэҥнээн, урукку-билиҥҥи өрүттэри көрүү, чуолаан кэпсэтии уонна боппуруостарга эппиэттээһин нөҥүө кыыс оҕону иитиигэ суолта уонна болҕомто ууруллар эйгэтин бөҕөргөтүү буолар. Тэрээһин иккис блогун «Түһүлгэ» НАДь методиһа Агафья Барашкова ылбаҕай ырыатынан саҕалаабытын ытыс тыаһынан доҕуһуоллаатылар, салҕыы уус-уран салайааччыта Василий Копырин иилээн -саҕалаан, болҕомтоҕо, түргэн толкуйга, хамсаныыга оонньуулары оонньотто. Бүтэһигэр, кыттыбыт дьиэ-кэргэттэргэ сэмэй бэлэхтэрин тэрилтэ, урбаан салайааччыларын ааттарыттан экспердэр туттардылар. Спонсордарбыт «Уйгу» маҕаһыын Мотрена Ильинична Дьячковская, «Кытаанах нэһилиэгэ» ТСТ администрацията (баһылык Пономарев И.Т)., В.С.Яковлев аатынан орто сокуола (директор Коркин И.И.)., олохтоох балыыһа (врач Попова А.Н.)., олохтоох почта (салайааччы Барашкова Н.Д.), «Түһүлгэ» норуот айымньытын Дьиэтэ (директор Пономарева А.В.)., тыа сирин модельнай библиотеката (сэбиэдиссэй Пономарева Л.А.). Бары спонсордарбытыгар, кыттааччыларбытыгар, экспердэрбитигэр барҕа махтал тылларын этэбит, ситиһиилээх, таһаарыылаах үлэни, тус олоххутугар дьолу-соргуну, или-эйэни, чэгиэн туругу, этэҥҥэ буолууну баҕарабыт.
