Николай Дьячковскай
Кытаанах нэһилиэгин олохтооҕо, Дьячковскай Николай Николаевич 1925 сыллаахха Кытаанахха төрөөбүт, 2025 сылга Улуу Кыайыы 80 сылын көрсө 100 сааһын туолар. Кытаанах оскуолатын сэттис кылааһын бүтэрэн баран “Бойобуой” колхуоска үлэлээбит.
Кытаанахха акушерканан 1942 сыллаахха үлэлии кэлбит, Нелунова Анастасия Никифоровналыын харахтарынан хайҕаһан, сөбүлэһэн, 1945 сыллаахха холбоһон ыал буолбуттар. Эдэр ыал биэс оҕону төрөтөн, көччөх гынан олох киэҥ суолугар атаарбыттар. Николай Николаевич партийнай оскуоланы бүтэрэн баран биригэдьииринэн, сельпоҕа товароведынан үлэлии сырыттаҕына партия ыйыытынан 1963 сыллаахха Хатылыга управляющайынан үлэлиир, онтон 1967 сыллаахха милилииссийэҕэ баһаарынай чаас начальнигынан үлэлиир.1969 сыллаахха Николай Николаевиһы Чыаппараҕа сэбиэтинэн, онтон ойоҕун Анастасия Никифоровнаны балыыһаҕа сэбиэдиссэйинэн анааннар баран 3 сыл үлэлээн баран дойдуларыгар Кытаанахха төннөн кэлэллэр. Дойдутугар кэлээт фермаҕа биригэдьииринэн ананан үлэлиир. Онно аҕыйах сыл үлэлээн баран сельпо анааһынынан Улахае –Күөлгэ продавеһынан үлэлиир, ол үлэлии сырыттаҕына кэргэнэ Анастасия өлөн дойдутугар төннөр, аны дойдутугар үлэ суох буолан, Сылаҥҥа Бэрэҕэ биригэдьииринэн үлэлээн иһэн, 55 сааһын сэттэ хонук туолара хаалбытын кэннэ күн сириттэн күрэнэр.
Николай Николаевич олоҕун устата туох баар общественнай үлэҕэ активнайдык кыттара, спортка дьоҕурдаах буолан колхуоһун улууска, республикаҕа көмүскээн турар, ол курдук, 1945 сыллаахха өрөспүүбүлүкэҕэ киирэн улууһун 9 көрүҥҥэ күрэхтэһэн, ордук сүүрүүгэ 100 м сүүрэн иккис миэстэни ылбыт, кылыыга, атах оонньуутугар 3, 4 миэстэлэргэ тахсан, бэйэтин спортка күүстээҕин, кыахтааҕын көрдөрбүт, олус дьулуурдаах, дьаныардаах спортсмен буоларын үрдүктүк сыаналаабыттар. Үс улахан кыргыттара аҕаларын батан волейболга Христин, Софья, Парасковья улуус сборнай хамаандатыгар сылдьыбыттара, онтон Софья Николаевна остуол тенниһигэр нэһилиэгин, улууһун чиэһин элбэхтэ көмүскээбитэ. Удьуор утумнуур диэн маны этэн эрдэхтэрэ, аны сиэн кыргыттара Настя, Света, Мила нэһилиэкпит бастыҥ спортсменнара, Кытаанахтарын эмиэ элбэхтик ааттаппыт кыргыттар, билигин хос сиэннэрэ спортка ситиһиилээхтик хардыылыыллар. Олох салҕанар, удьуор утума быстыбат…
