100 сыллаах Дьоруой Ийэ
Ийэ барахсан бу орто туруу дойдуга оҕо төрөтөн , бүөбэйдээн, хас биирдии оҕото үчүгэй дьылҕалаах буоларыгар сыратын уурар. бүгүн ахтыллар дьоруойбут -Герой Ийэ Ирина Тихоновна Барашкова, 100 сааһын туолар. Улуусупутугар «Үйэлээх Килбиэн», нэһилиэкпитигэр «Албан аат -дохс ун санаа» сылларын чэрчитинэн үбүлүөйдээх дьоммутун нэһилиэнньэҕэ билиһиннэрэр сыалтан кэпсиибит.
Барашкова Ирина Тихоновна, 1925 сыллаахха, от ыйын 1 күнүгэр, Уус -Алдан Курбуһах нэһилиэгэр Толоон Эбэ диэн алааска, колхозтаах дьиэ кэргэнигэр төрөөбүт. Аҕата эрдэ ыалдьан өлбүт, ийэтэ 1941 сыллаахха хоргуйан өлбүт. Инньэ гынан тулаайах хаалан кыайан үөрэммэтэх. Тулаайах буолан кыра эрдэҕиттэн туох баар үлэҕэ сыстаҕас буола улааппыта. Ийэтэ өлбүтүн кэннэ икки кыра бырааттарын, Ньукулайдаах Баһылайы, бэйэтэ көрөн – истэн улаатыннаран ыал дьон оҥортообута.
Аҕа дойду сэриитин кэмигэр ол кэминээҕи оҕолор курдук түүннэри – күннэри хонуу, бааһына үлэтигэр үрдүк таһаарыылаахтык үлэлээн 1947 сыллаахха бэс ыйын 26 күнүгэр “Үлэҕэ килбиэнин иһин” мэтээлинэн наҕараадаламмыта.
Пенсияҕа тахсыар диэри Улахан – Күөл, Кытаанах маҕаһыыннарыгар уборщицанан, интернакка түүҥҥү ньээҥкэнэн үлэлээбитэ.
1947 с. Барашков Дмитрий Дмитриевичкэ кэргэн тахсан, 49 сыл бииргэ олорбуттара, 7 уол, 3 кыыс оҕоломмуттара, барыларын үөрэттэрэн үлэһит дьон оҥорбуттара. 1966 сыллаахха “Герой Ийэ” үрдүк аатын ылбыта. Ирина Тихоновна олус иистэнньэҥ, асчыт, ыллыктаах тыллаах –өстөөх, ыраас-хороос туттунуулаах хоһуун үлэһит дьахтар эбит. «Төһө да элбэх бииргэ төрөөбүттэр буолларбыт хаһан да аччыктаабатахпыт, куруук ыраас тып-тап таҥастаах-саптаах буоларбыт», жиэн оҕолоро олус истиҥник ахталлар. Оҕолоро үчүгэй үлэһит, доруобай буолалларыгар өйүн-санаатын барытын түмпүтэ. Ол түмүгэр, уолаттара улууска, республикаҕа биллэр спортсменнар, механизатордар буола үүммүттэрэ. Оҕолорун ситиһиилэриттэн, кыайыыларыттан сүрдээҕин үөрэрэ, киэн туттара. Кытаанахха хайыһар күрэхтэһиитэ буолла да бастакынан киирэн уолаттарыгар болейщиктыыра диэн ахталлар. Бэйэтэ айылҕаттан талааннаах иистэнньэҥ буолан пенсияҕа тахсан баран туостан араас иһиттэри тигэн конкурстарга, фестивалларга кыттан дипломнарынан, грамоталарынан наҕараадаламмыта. Ол курдук, 1994 сыллаахха туос иһит республикатааҕы быыстапкатыгар 2 миэстэни ылан дипломунан сыаналаах бирииһинэн наҕараадаламмыта. Кини туостан үлэлэрэ республика, кыраныысса таһыгар тиийэ выставкаларга көрдөрүүгэ турбуттар. Үөһээ Бүлүүтээҕи норуот педагогикатын музейыгар көрдөрүүгэ тураллар.
Герой Ийэ Ирина Тихоновна сыралаах үлэтэ “1941-1945 сс. Аҕа Дойду сэриитин сылларыгар килбиэннээх үлэтин иһин”, юбилейнай мэтээллэринэн, холкуос, сопхуос Бочуотунай грамоталарынан бэлиэтэммитэ. Тыыл, Үлэ бэтэрэээнэ. 1995 сыллаахха балаҕан ыйын 23 күнүгэр ыалдьан өлбүтэ. Билигин улахан Ийэ олоҕун элбэх сиэн, хос сиэн, хос-хос сиэннэр салҕыыллар.
.1. Барашков Валерий Дмитриевич, 1948 с.т., суоппар. “Үлэ, Албан аат” уордьан 3 ст. Кавалера. Республика , улуус хас да төгүллээх чемпион суоппара, СӨ транспорын туйгуна, кэргэнэ Светлана Васильевна врач, 4 оҕолоох.
2. Барашков Филипп Дмитриевич, 1949с.т.,тракторист, Улуус, Чурапчы совхоз чемпион тырахтарыыһа, кэргэнэ Евдокия Гаврильевна, техүлэһит, 4 оҕолоох.
3. Барашков Петр Дмитриевич, 1951 с.т., тракторист, СӨ тыатын хаһаайыстыбатын туйгуна, Кытаанах нэһилиэгин Бочуоттаах олохтооҕо. Хайыһарга республика, улуус хас да төгүллээх чемпиона, призера, кэргэнэ Анисия Филипповна, ветеринар, 4 оҕолоох
4. Барашков Дмитрий Дмитриевич, 1953 с.т., суоппар. Республика, улуус чемпион суоппара, отчута. Хайыһарга республика, улуус хас да төгүллээх чемпиона, призера, кэргэнэ Мотрена Терентьевна ветврач, 3 оҕолоох.
5. Барашкова-Луковцева Анастасия Дмитриевна, 1955 с.т., Чурапчытааҕы пекарня техүлэһитэ, кэргэнэ Луковцев Михаил Петрович, суоппар, 4 оҕолоох
6. Барашкова –Монастырева Вера Дмитриевна, 1957 с.т., детсадка завхоз. Туос иһити тигиинэн дьарыктаммыта, кэргэнэ Владитмир Николаевич Монастырев электрик, 3 оҕолоох.
7. Барашков Николай Дмитриевич, 1960 с.т.,хайыһарга республика, улуус хас да төгүллээх призера, кэргэнэ Мария Павловна фельдшер, 2 оҕолоох.
8. Барашков Василий Дмитриевич, 1961 с.т.Үрдүк үөрэхтээх физкультура учуутала. Билигин “Тирэх” СПОК салайааччыта. Элбэх знактар хаһаайыттара. Хайыһарга,, сүүрүүгэ республиканскай улуус элбэх төгүллээх чемпиона, кэргэнэ Антонина Николаевна – зоотехник, 2 оҕолоох
9. Барашкова Надежда Дмитриевна, 1963 с.т., идэтинэн детсад воспитателэ,билигин Килэҥки почтатын начальнига. Хас да ыҥырыылаах нэһилиэк сэбиэтин депутата
10. Барашков Алексей Дмитриевич, 1964 с.т.үрдүк үөрэхтээх физкультура учуутала. Хайыһарга, сүүрүүгэ улуус, респбулика призера, кэргэнэ Дария Герасимовна детсад воспитателэ, 1 оҕолоох.