Кытанахская модельная библиотека

Улуустааҕы хапсаҕай күрэҕэр Кытаанахтар хаһан да мустубатахпытын түмсэн, сорох ыйааһыннарга 2-лии киһи буолан кыттан, ыччаттарбыт бэйэлэрэ ааттыылларынан “Мечта”хамаанда тэринэн 5 -с миэстэҕэ тахсан үөрүүбүт муҥура суох буолла. Өтөр маннык ситиһии суоҕа диэн бэлиэтиэххэ наада. 57 кг Айтал Монастырев 2-с миэстэ, 85 кг 3 миэстэ Коля Коркин, манан сиэттэрэн Николай Терютиҥҥа махталбытын тиэрдэбит олохтоохтор ааттарыттан. Инникитин да нэһилиэгин туһугар кыһаллыыҥ уҕараабатын. Манна уоллуу аҕа Монастыревтар, убайдыы быраат Андреевтар 4, Собакиннар-Коркиннар аймахтыылар 3 буоланнар кыттыылара улахан хайҕаллаах, махталлаах диэн бэлиэтиир тоҕоостоох.

     Тохсунньу 24 чыыһылатыгар, Улуус баһылыга Степан Анатольевич  Саргыдаевтыын нэһилиэкпит баһылыга Егор Николаевич тыа хаһаайыстыбатын кооперативын тэрийии,саҥа котельнай уонна тустуу залын тула кэпсэтиитэ буолбута.

    Онтон, бэҕэһээ, тохсунньу 27 күнүгэр, Егор Николаевич спорт миниистирэ Л.Н.Спиридоновтыын көрсүһүүтүн,кэпсэтиитин түмүгэр, саха сирэйдээх киэн туттар киһибит,биир дойдулаахпыт Д.ПКоркин төрөөбүтэ 100 сылын көрсө нэһилиэкпитигэр саҥа спорт саалатын тутан үлэҕэ киллэрии боппуруоһа көрүлүннэ.     Егор Николаевичпыт тутуу министиирин бастакы солбуйааччытыгар Евгений Егорович Афанасьевтыын көрсүһүүтүгэр саҥа спорт саалатын тутуу боппуруоһа, иккиһинэн аварийнай дьиэлэртэн көһөрүллүү боппуруоһа уонна үһүс боппуруос хайыһар базатын тутууга, суолун-ииһин оҥорууга, ханнык хайысханан тутууну ыытыахха сөбүй диэн кэпсэтии ыытылынна. Кэпсэтии сүнньүнэн 2022 сылга аварийнай дьиэҕэ тахсыбыт 4 квартиралаах дьиэбитин көһөрүү боппуруоһугар биһиги 3-с потокка хапсар эбиппит, уопсай федеральнай сайтка барытыгар киирэн турар. Онон сибээстээн кэлэр сылга атын программанан киирсэр гына сөҥнөһүү, кэпсэтии буолла, онтон бэйэбит бэлэмнэнии үлэтин-ханаһын олохтоох дьаһалта ыытан , эһиилги конкурска кыттар гына тэрийиэхтээхпит.

Күн бүгүн  тыа хаһаайыстыбатын минииистирин Артем Александрович Александров приемугар сылдьан, сүрүн кэпсэтии Кытаанах нэһилиэгэр потребительскай уонна сельхоз кооперативтары тэрийии, үүт сыанатыгар, сылгы төбөтүгэр кэлэр харчыга, күрүө, сири таҥастыырга, өр сыллаах от, бурдук ыһарга бааһына оҥоруутугар тула буолла. Миниистир көҕүлээһининэн бу кэпирэтииптэри тэрийээһиҥҥэ быһаччы үлэлэһэр исписэлиистэри кытта киирэн салҕыы үлэлээтибит. Манна улууспутугар баһылыгынан үлэлээбит Андрей Тимофеевич Ноговицыны көрсөн, кинини илдьэ киирэн манна сүбэ бөҕө, тыл-өс буолан кэпсэтии таҕыста. Бу кэпсэтии түмүгүнэн олунньу 4 күнүгэр, биһиги бааһынайдарбытын кытта кооператив боппуруоһугар, тыа хаһаайыстыбатын министиэристибэтин үлэһиттэрэ кэпсэтэ, көрсүһэ кэлэр буоллулар.

    Онтон нэһилиэкпитигэр бу бээтинсэҕэ 2-с төгүлүн ыытыллар алын кылаас уолаттарыгар аналлаах улуустааҕы “Ылгын Боотур” күрэх ыытыллыаҕа. Маныаха баһылыкпыт Егор Николаевич быһаччы кэпсэтиитинэн спонсордары кытары үлэлэһэр, ол курдук нэһилиэкпититтэн төрүттээх кыргыттарбыт: Мария Скрябина, Марфа Коркина бу күрэххэ анаан сыаналаах бэлисипиэттэри, эдьиийдии балыс Акулина, Люция Андреевалар  спонсордаатылар.

   Бу курдук нэһилиэкпит баһылыга Егор Николаевич  ыпсарыылаах кэпсэтиитинэн нэһилиэкпит бары өттүнэн  сайдыыга кыралаан хардыылары оҥортуур.